Almennar upplýsingar um námið

Námskeiðið er ætlað faglærðum blómaskreytum og þeim sem hafa nokkra reynslu af blómaskreytingum sem og annarri hönnunarvinnu. Kennsla fer fram á ensku og að mestu er um verklega kennslu að ræða.

Tveggja daga handverksnámskeið þar sem mikil áhersla er lögð á mismunandi tækni og verklag þegar kemur að skreytingum. Mikil áhersla verður lögð á að tengja saman fræðin við hinn verklega hluta.

Fyrri daginn verður fjallað um útfaraskreytingar dagsins í dag með áherslu á sjálfbærni og umhverfisvæna nálgun í samsetningu og hönnun. Fjallað verður um nýjungar í samsetningu og vali blóma, hvernig er hægt að nýta efniviðinn sem best og hvað þarf að huga að þegar við verðleggjum okkar eigið handverk. Einnig er fjallað um hvað við getum gert sem blómahönnuðir til að koma til móts við okkar viðskiptavini sem kalla eftir umhverfisvænni og sjálfbærri hönnun?

Seinni daginn verður fjallað um helstu strauma og stefnur  þegar kemur að brúðkaupsskreytingum. Hvernig er best að undirvinna brúðkaupsskreytingar og hvaða efnivið er best að velja. Hvað er það sem gerir brúðkaupsskreytingar einstakar og hvaða fylgihluti er hægt að nýta til að ná fram þessum auka áhrifum og hrifningu sem sótt er í.

– Aðeins 14 þátttakendur komast að á námskeiðinu – 

Kennsla: Sara-Lisa Ludvigsson blómaskreytir.

Sara-Lisa er fædd í Svíþjóð og kláraði nám í blómaskreytingum frá garðyrkjuskóla í Norrköping, fór síðan í framhaldsnám við háskólann í Mölndal í Svíþjóð og útskrifaðist þaðan sem blómaskreytingarkennari. Sara-Lisa hefur unnið víða við blómaskreytingar og frá árinu 2016 hefur hún rekið sitt eigið fyrirtæki þar sem hún sér um minni sem stærri skreytingarverkefni, heldur námskeið heimavið og víða erlendis, tekur þátt reglulega í hinum ýmsu blómasýningum og kennir við blómaskreytingarskóla í Svíþjóð. Þá hefur Sara-Lisa tekið þátt í ýmsum blómaskreytingarkeppnum en hefur meira unnið sem dómari síðustu misserin, enda að eigin sögn sé hún ekki uppfull af keppnisþrá.

Sara-Lisa sækir innblástur víða og m.a. í sinn fyrsta kennara, Ulla Akesson, en þar lærði Sara-Lisa að sköpunargleði hefur engan eiginlegan aldur eða líftíma, sköpunarferlið hefur ekkert upphaf og engan endi. Við það að vera virk í kennslu hafa nemendur um leið haft mikil áhrif á Söru-Lísu, nemendur gera kröfu um að kennari sé alltaf á tánum og tilbúinn að miðla nýjustu þekkingu. Sara-Lísa leggur því mikla áherslu á eigin starfsþróun og nýjungar.

Sara-Lisa á Facebook

Tími: Fös. 8. apríl kl. 9 – 17 og lau. 9. apríl kl. 9 – 17

Staður: Hjá LbhÍ á Reykjum í Ölfusi

Verð: 64.900 kr. (innifalið í verði er allur efniskostnaður, kennsla erlends sérfræðings, hádegisverður og kaffi)