Tilgangur námskeiðsins er að nemendur öðlist skilning á eðli sprotafyrirtækja og starfsumhverfi þeirra fyrstu árin í rekstri. Farið verður yfir sögu frumkvöðlafræðinnar á 20. öld, hvað reki fyrirtæki til stöðugra breytinga og frumkvöðla til að stofna sprotafyrirtæki, hvernig fjórða iðnbyltingin hefur áhrif á þessar breytingar, hvað beri að varast við stofnun sprotafyrirtækja og hvaða greiningartól gagnist við slíka greiningarvinnu. Þá verður farið yfir uppsetningu á viðskiptamódeli, myndun teymis og fjármögnunarmöguleika sprotafyrirtækja, kosti þeirra og galla.

Við lok námskeiðs eiga nemendur að .ekkja það ferli sem þarf að fara í gegnum ef hugmynd að sprotafyrirtæki kviknar og geta greint gæði hugmyndar að sprotafyrirtæki með helstu greiningartólum og þannig metið hvort raunveruleg þörf og markaðsglufa sé á markaði fyrir hugmyndina.

Nemendur læra einnig að þekkja grunnatriði við uppsetningu á viðskiptamódeli, fjármögnunarþörf og heppilegustu útfærslu fjármögnunar, gera áhættumat og setja upp útgönguáætlun (e. exit strategy).

Nemendur sem sækja þetta námskeið hjá Endurmenntun LBHÍ sækja sama námskeið og nemendur sem skráðir eru í BS nám við Landbúnaðarháskóla Íslands. Námið er metið til 2 ECTS eininga.

Námskeiðið er kennt á seinni haustönn sem hefst 17. október og lýkur 3. desember. Stundaskrá liggur ekki enn fyrir en verður birt hér um leið og hægt er.

Mætingaskylda er í vettvangsferð þar sem 3 til 4 öflug sprotafyrirtæki verða heimsótt í dagsferð til Reykjavíkur og nágrennis. Auk þess er skyldumæting í fyrirlestur gestafyrirlesara. 

Námsmat byggist að mestu leyti á hópverkefni sem nemendur vinna að í áfanganum um þeirra eigin sprotafyrirtæki. Það skiptist í lyfturæðu (2%), lokakynningu (24%) og viðskiptaáætlun (40%) fyrir fyrirtækið. Að auki vinna nemendur skýrslu úr efni gestafyrirlesara (5%), tilvikagreiningu (24%) og skýrslu úr námsferð (5%).

Kennari námskeiðsins er Helgi Eyleifur Þorvaldsson aðjúnkt og brautarstjóri í búfræði við Landbúnaðarháskóla Íslands. Helgi er búfræðingur og með BSc í búvísindum frá Landbúnaðarháskólanum á Hvanneyri en hefur auk þess lokið meistaragráðu í viðskiptastjórnun (MBA) með áherslu á frumkvöðlafræði og nýsköpun frá þýska háskólanum Hochschule für Wirtschaft und Recht (HWR) í Berlín.