Ferðaþjónusta er ein stærsta atvinnugrein landsins sem styður og og eflir samfélagið í gegnum fjölþætt tækifæri til uppbyggingar, atvinnu- og nýsköpunar. Margir bændur hafa fléttað saman ferðaþjónustu og landbúnað með góðum árangri og á þessu námskeiði er sérstök áhersla lögð á landbúnaðartengda afþreyingu og þjónustu.

Um er að ræða 12 vikna námskeið sem haldið er á haustönn og metið til þriggja framhaldsskólaeininga. Á námskeiðinu er fjallað um ferðaþjónustu á Íslandi, stöðu, þróun og fjölbreytni greinarinnar.

Megin áhersla er lögð á umfjöllun um landbúnaðartengda afþreyingu, þjónustu og vörur. Einnig er fjallað um skipulagningu, áætlanagerð og markaðssetningu sem þarf að vinna að þegar hefja á ferðaþjónustu.

Þátttakendur á námskeiðinu læra að leggja mat á fjölbreytni ferðaþjónustu hér á landi og gera sér grein fyrir því hvað felst í landbúnaðartengdri afþreyingu og hvaða vörur og þjónusta eru nú þegar á boðstólnum. Einnig öðlast þeir færni í því að framfylgja áætlunum um skipulag, markaðssetningu og aðra þætti sem þarf til að hefja ferðaþjónustu, með fjölbreytni og tekjumöguleika að leiðarljósi.

Farið er í vettvangsheimsóknir til ferðaþjónustubænda þar sem þátttakendur fá kynningu á þjónustu og
starfsemi hjá viðkomandi aðilum. Vettvangsferðir eru valkvæðar fyrir þá sem sækja námskeiðið
í gegnum Endurmenntun LBHÍ. 

Nemendur sem sækja þetta námskeið hjá Endurmenntun LBHÍ sækja sama námskeið og nemendur sem skráðir eru í starfsnám í Búfræði við Landbúnaðarháskóla Íslands. Þeir sem uppfylla öll skilyrði til próftöku gefst kostur á að fá vottað einingamat í lok námskeiðs. Námskeiðið er metið til 3 fein eininga. Stundaskrá og nánari upplýsingar: 
UGLA – Kennsluskrá 2023-2024 > FEÞJ1LA03 Ferðaþjónusta (lbhi.is)

Kennari: Kristján Guðmundsson verkefnastjóri hjá Áfanga- og markaðsstofu Vesturlands og stundakennari við LBHÍ. Kristján er með áralanga reynslu af ferðaþjónustutengdum störfum.