Keppnisnám í Reiðmanninum er nýtt nám á vegum Endurmenntunar LBHÍ fyrir alla sem vilja öðlast aukna færni í að undirbúa bæði sjálfan sig og hestinn fyrir þátttöku í keppnum. Námið er einstaklingsmiðað og hentar jafnt þeim sem eru að stíga sín fyrstu spor í keppnisreiðmennsku sem og reynslumiklum keppendum sem vilja bæta árangur sinn í keppnum og þjálfa hestinn sinn í keppni.

Námskeiðið er opið öllum sem náð hafa 18 ára aldri og með góða reynslu af hestamennsku.
Ekki er skilyrði að hafa farið í gegnum nám í Reiðmanninum en ma. er tekið tillit til reynslu umsækjanda af hestamennsku/reiðmennsku, hvort viðkomandi hafi sótt nám í reiðmennsku og hver hestakostur er. 

MARKMIÐ

Markmið námsins er að þátttakendur öðlist aukna færni í að undirbúa og þjálfa bæði sjálfan sig og hestinn fyrir þátttöku í keppnum og sýningum, sem og að öðlast færni í markvissri  markmiðasetningu við þjálfun keppnishesta með áherslu á þær æfingar sem hafa hvað mest nytsamlegt gildi fyrir keppnisþjálfun.

Áhersla er lögð á að geta riðið hestinum í réttri líkamsbeitingu með léttleikandi samband til afkasta. Jafnframt er lögð áhersla á líkamsbeitingu, orkustig, söfnun, fjaðurmagn og rými hestsins. Á námskeiðinu öðlast þátttakendur einnig færni í að skynja andlegt jafnvægi, samstarfsvilja og einbeitingu
hestsins við mikið þjálfunarálag.

Námið er einstaklingsmiðað og er kennsla miðuð út frá markmiðum og getu hvers og eins.

UM NÁMIÐ

Námið er metið til 6 eininga á framhaldsskólastigi (fein). Einingagjöfin er háð því að nemendur hafi sótt
90% verklegra tíma í staðarnámi og standist námsmat. Að baki hverrar einingar er gert ráð fyrir
3 vinnudögum nemanda, hvort sem um er að ræða fyrirlestra, verklega tíma eða heimanám.

Námskeiðið er kennt á fjórum verklegum helgum, auk fjögurra eftirmiðdaga í miðri viku á tímabilinu janúar – apríl. Kennsla fer fram í einstaklings- og paratímum, einkakennslu í reiðhöll og úti á hringvelli eða skeiðbraut. Á eftirmiðdögum er kennt frá ca. kl. 15-20 og á laugardögum og sunnudögum frá ca. kl. 8-18.

Fyrstu helgina í náminu er gerð ítarleg úttekt á knapa og hesti. Eftir fyrstu helgi setur knapinn upp markmið annarinnar fyrir sig og hest sinn í samráði við reiðkennara.

Síðasta helgin í náminu er haldin í glæsilegri reiðhöll LBHÍ á Mið-Fossum í Borgarfirði þar sem allir þrír hóparnir koma saman og keppa á útivelli skólans. Á laugardeginum eru æfingar með  reiðkennurum, pepp og fyrirlestur og á sunnudeginum er mót. 

FYRIRLESTRAR  Í BOÐI

Í náminu er boðið upp á fyrirlestra á Teams með fremstu sérfræðingum á sínu sviði:
– Fyrirlestur með íþróttadómara á vegum Hestadómarafélags Íslands (farið verður yfir löglegan búnað).
– Fyrirlestur með gæðingadómara á vegum Gæðingadómarafélags LH
– Fyrirlestur með áherslu á  keppnisjárningar
– Fyrirlestur um hugarfar og stemning á mótsdegi

Auk þess verður lesefni aðgengilegt á kennsluvefnum skólans um fóðrun, umhirðu og
undirbúning keppnishesta.

VERKLEGIR TÍMAR

Kennsla mun fara fram í einstaklings- og paratímum auk þess sem þátttakendur fá einkakennslu í reiðhöll
og úti á hringvelli eða skeiðbraut. Í verklegum tímum er áhersla lögð á uppbyggingu og þjálfun knapa og hests fyrir keppni með einstaklingsmiðuðum áherslum. Farið verður í að setja upp prógramm sem hentar hverjum og einum, og er farið í yfirferðaþjálfun og skeiðþjálfun þar sem það á við.

KOSTNAÐUR VIÐ NÁMIÐ

Námið kostar 199.000 kr. Þegar nemandi hefur samþykkt inngöngu í námið ber honum að greiða staðfestingargjald að fjárhæð 99.000 kr. sem er óafturkræft. Staðfestingargjaldið dregst frá heildarverði námskeiðsins. Endurmenntun LBHÍ skiptir eftirstöðvum kr. 100.000 niður á tvo gjalddaga: 1. mars og 1. apríl og er hvor greiðsla kr. 50.000 kr.

Hægt er að óska eftir því að greiða námskeiðsgjaldið að fullu. Athygli er vakin á því að flest stéttarfélög styrkja félagsmenn sína sem sækja nám og námskeið. Greiða þarf námskeiðsgjald að fullu til að fá staðfestingu á að viðkomandi hafi stundað nám í keppnisreiðmennsku á vegum Endurmenntunar LBHÍ.

ATH. Nemandi sem hefur þegið pláss í Reiðmanninum ber að greiða staðfestingargjald kr. 99.000 og er staðfestingargjaldið óafturkræft. Nemandi sem hefur hafið nám í keppnisreiðmennsku
ber að greiða námskeiðsgjaldið að fullu. 

 KEPPNISNÁM REIÐMANNSINS ER Í BOÐI Á EFTIRTÖLDUM STÖÐUM VOR 2024:

• LBHÍ á Mið-Fossum: Guðmar Þór Pétursson og Fanney Dögg Indriðardóttir reiðkennarar

 Verklegar helgar: 27.-28. jan., 17.-18. feb., 23.-24. mars og 26. & 28. apríl.
Verklegir tímar á þriðjudagseftirmiðdögum: 13. feb., 5. mars, 2. apríl og 16. apríl.

• Létti á Akureyri: Erlingur Ingvarsson reiðkennari

 Verklegar helgar: 13.-14. jan., 3.-4. feb., 2.-3. mars og 27.-28. apríl.
Verklegir tímar á þriðjudagseftirmiðdögum: 13. feb., 19. mars, 9. apríl og 23. apríl.

• Sleipni á Selfossi: Hanna Rún Ingibergsdóttir og Hjörvar Ágústsson reiðkennarar

 Verklegar helgar: 13.-14. jan., 17.-18. feb., 16.-17. mars og 27.-28. apríl.
Verklegir tímar á miðvikudagseftirmiðdögum: 31. jan., 28. feb., 3. apríl og 17. apríl.

• Geysir á Hellu: Hanna Rún Ingibergsdóttir og Hjörvar Ágústsson reiðkennarar

Verklegar helgar: 20.-21. jan., 24.-25. feb., 9.-10. mars og 27.-28. apríl
Verklegir tímar á miðvikudagseftirmiðdögum: 14. feb., 6. mars, 10. apríl og 24. apríl

Umsjónarmaður Reiðmannsins hjá Endurmenntun LBHÍ