Endurmenntun Landbúnaðarháskóla Íslands býður upp á tveggja daga helgarnámskeið í fortamningum hrossa. Haustið 2023 sá Inga María Jónínudóttir reiðkennari og tamningamaður um kennsluna Námskeiðið er bæði bóklegt og verklegt og fer fram í glæsilegri reiðhöll háskólans á Mið-Fossum í Borgarfirði.

Námskeiðið er ætlað öllu áhugafólki um íslenska hestinn og reiðmennsku, og nýtist sérstaklega vel þeim sem eru að temja tryppin sín sjálf eða senda unghross áfram í frumtamningu.

Gott er að vera með tryppi/unghross sem eru 2-5 vetra gömul og hrossin mega vera mismikið meðhöndluð þar sem kennari miðar kennsluna að hverju hrossi.

Í boði er að vera tryppi/unghross á fóðri í stíu yfir nótt.

Farið er í gegnum fyrstu nálgun við tryppið, hvernig það er gert bandvant og undirbúið undir frumtamningu. Áhersla er lögð á með hvaða hætti hesturinn lærir og hvernig er unnt að vinna traust hestsins og nemendur læra að lesa andlegt og líkamlegt ástand hrossanna. Nemendur fá verklega þjálfun í fortamningum, aðferðum og vinnubrögðum með það að markmiði að skapa gott samband milli manns og hests og öðlast grunnfærni og skilning á að mýla ótaminn hest og kenna honum á múl og taum á öruggan hátt.

Hross sem hafa fengið þennan forskóla eru betur andlega tilbúin fyrir frumtamingu og um leið er hægt að ná niður kostnaði með því að undirbúa hrossið á þennan hátt.

Hámarksfjöldi nemenda eru 12.

Kennari: (Inga María Jónínudóttir reiðkennari og tamningamaður. Inga María er með um 40 ára reynslu af frumtamningum/fortamningum)

Tími: Auglýstur þegar nær dregur námskeiði

Staður: Reiðhöllin á Mið-Fossum í Borgarfirði 

Verð: Auglýst þegar nær dregur  námskeiði. Innifalið er kennsla, aðgangur að stíu og fóðri fyrir unghrossin, hádegisverður báða daga og kaffiveitingar.