Á námskeiðinu er unnið með umhverfisteikningu, fjarvídd og skissuvinnu út frá ólíkum forsendum. Eðli, litir og tónar mismunandi gróðursamfélaga í umhverfinu eru rannsakaðir og skráðir, og litir og efniskennd í manngerðu umhverfi skoðaðir.

Nemendur læra að vinna með umhverfisteikningu, fjarvídd og skissuvinnu út frá ólíkum forsendum, m.a. stærð litaflata, afstöðu og áhrif á upplifun í hönnunarhugmyndum og undirstöðuatriði listfræðinnar.  Nemendur vinna að ljósmynda- og skissuverkefnum sem tengjast náttúru- og umhverfisskoðun með hliðsjón af mismunandi litaforsendum, myndbyggingu, myndskurði og sjónarhorni og í gegnum verkefnavinnuna er unnið með sköpun og túlkun á markvissan hátt til að dýpka skynjun og auka færni við greiningu og mat á sjónrænum viðfangsefnum.

Einnig eru athygliverðar tengingar umhverfis og bygginga kynntar, sem og möguleikar þess að tengja saman tækni og skissur, ólíka miðla og aðferðir kynntar á margvíslegan hátt.

Áhersla er lögð á að nemendur dýpki fræðilegan skilning sinn með því að nýta möguleika Internetins og unnið með forritin Power Point og myndvinnsluforrit þar sem það á við.

Námskeiðið er 7 vikna langt og kennt í staðnámi hjá LBHÍ á Hvanneyri í Borgarfirði.  Stundaskrá er auglýst þegar nær dregur námskeiði.

Nemendur sem sækja þetta námskeið hjá Endurmenntun LBHÍ sækja sama námskeið og nemendur sem skráðir eru í BS nám í Landslagsarkitektúr við Landbúnaðarháskóla Íslands. Nemendur sem uppfylla öll skilyrði til próftöku gefst kostur á að fá vottað einingamat í lok námskeiðs.

Námskeiðið er á BS stigi og metið til 4 ECTS eininga. Stundaskrá og nánari upplýsingar má nálgast hér: UGLA – Kennsluskrá 2023-2024 > 01.54.01 FORMFRÆÐI HÖNNUNAR I (lbhi.is)