Námskeiðið Völd og lýðræði í skipulagi hentar öllum sem hafa áhuga á að kynna sér mismuninn milli fræðilegrar skipulagsvinnu (e. idea of planning) annars vegar og raunveruleikans í skipulagsvinnu hins vegar, það er hvernig þéttbýli þróast út frá sjónarhorni valdataflsins og hvaða áhrif vald getur haft á skipulagsvinnu.

Takmarkið er að nemendur þrói með sér djúpstæðan og nothæfan skilning á því hvernig stefnumótun og skipulag eru samofin mörgum stofnunum, hagfræðilegum og félagslegum forsendum, valdatengslum og orðræðum. Fjallað er um spurningar eins og: Hver á borgina? Hver ræður? Hver græðir og hver tapar?

Ennfremur er fjallað um togstreituna milli draumsýnar og veruleika í skipulagsvinnu. Nemendum er sýnt fram á hvernig valdatafl í skipulagsvinnu getur birst í raunveruleikanum, mikilvægi íbúalýðræðis og hvernig ólíkir hagsmunaaðilar hafa oft ólíkar hugmyndir um skipulag.

Til að sýna fram á þetta leysa nemendur hagnýtt verkefni í orðræðugreiningu sem gildir 70% af heildareinkunn. Auk þess eru verklegar æfingar sem jafnan eru unnar í hóp og gilda 30%.

Umsóknarfrestur er til 15. október.

Stundaskrá og nánari upplýsingar: 
UGLA – Kennsluskrá 2023-2024 > 08.60.02 VÖLD OG LÝÐRÆÐI Í SKIPULAGI (lbhi.is)

Kennari: Sverrir Örvar Sverrisson skipulagsfræðingur og verkefnastjóri hjá Vegagerðinni.

Tími: Kennsla hefst formlega 19. október og lýkur 5. desember. Tvær vinnulotur með skyldumætingu eru haldnar hjá LBHÍ á Keldnaholti í Reykjavík. 

Verð: 54.000 kr. 

– Við vekjum athygli á að hægt er að sækja styrk hjá stéttarfélögum fyrir námskeiði eða námi –

STUNDASKRÁ BIRT SÍÐAR