Vönduð hófhirða og járning skipta miklu máli fyrir heilbrigði, velferð og endingu hesta. Á námskeiðinu er fjallað um líffærafræði neðri hluta fótar með áherslu á uppbyggingu hófsins, eðli hans og hirðingu. Farið er í gegnum mikilvægi réttrar hófhirðu við uppeldi hrossa og umhirðu stóð- og unghrossa, skeifur og verkfæri til járninga, auk þess sem þátttakendur frá undirstöðuþjálfun við járningar.

Þátttakendur læra m.a. að:
– Þekkja uppbyggingu neðri hluta fótar og hófs og geta gert grein fyrir helstu beinum og sinum og
skilja virkni þeirra
– Skilja og geta gert grein fyrir eðli og starfsemi hófsins og hvers vegna almenn hófhirða er mikilvæg
– Skilja mikilvægi réttrar fótstöðu og geta útskýrt hófhirðu í samræmi við það
– Þekkja helstu járningarverkfræði og kunna að nota þau við járningar
– Skilja áhrif mismunandi fótstöðu og járninga á hreyfingar og ganglag

Um er að ræða tveggja daga námskeið í járningu og hófhirðu hrossa með Sigurði Torfa Sigurðssyni járningameistara.
Námskeiðið er bæði bóklegt og verklegt og haldið hjá Landbúnaðarháskóla Íslands á Hvanneyri
helgina 2. – 3. nóvember. Verklegi hlutinn fer fram í glæsilegri reiðhöll háskólans
á Mið-Fossum sem er í 5 mínútna akstursfjarlægð frá Hvanneyri.

Á laugardeginum er fræðileg kennsla á Hvanneyri fram yfir hádegi og í hádeginu snæða þátttakendur saman í mötuneyti skólans. Eftir hádegi er verkleg sýnikennsla í reiðhöllinni á Mið-Fossum. Á sunnudegi er nemendum skipt í 3 hópa, 4-5 í hverjum hóp. Hver hópur fær um tveggja og hálfs klukkustundar þjálfun í járningu og hófhirðu undir dyggri handleiðslu Sigurðar Torfa járningameistara.

Hámarksfjöldi er 16 manns.

– Þau sem eiga járningaverkfæri eða hafa tök á að fá verkfæri að láni eru hvött til að taka þau með á námskeiðið –

Kennari: Sigurður Torfi Sigurðsson járningameistari og ráðunautur hjá RML.

Verð: 39.900 kr. Innifalið í verði er kennsla, verkfæri fyrir þá sem þurfa, léttur hádegismatur og kaffiveitingar

Staður: Hjá LBHÍ á Hvanneyri og í reiðhöll skólans á Mið-Fossum í Borgarfirði

Tími: Lau. 2. nóv. og sun. 3. nóv kl. 10 – 16

– Við minnum á að hægt er að sækja um styrk frá stéttarfélögum til að sækja námskeið eða nám –